Chapter 59

wai sai Abba da yake sanye da fararen kaya tas ya riƙe mini hannuna. Ya jijjiga mini kansa alamar kar na je, haka na durƙushe a wajen ina kuka ta na ta aikin lallashina. Shewa da ihun da na ji an saka a filin tsakar gidan shi ya yi nasarar dawo da ni cikin hayyacina daga nisan zangon da na yi a cikin kogin tunanin da na faɗa. Na kai hannuna na kawar da hawayen da suka ɓata mini fuskana na yunƙura zan tashi na ga an shigo da ledan kaya cikin ɗakin. "Ledar nan fa, na wane ne?". Sha'awanatu da ta shigo da akwatin ta washe baki ta na kallona, don tun bayar faruwar wancan abun tsakanina da ita ta shiga taitayinta ba ita kaɗai ba ma har wasu daga cikin matan gidan, silar da ya sa suke shakka ta kenan. Mun ɗinke ni da ita don ta zama cikakkiyar ƴar fadata mai lasisi. Duk wani jagwal da ta taro yake neman girmewa lissafin ƙwaƙwalwarta ni take tunkarowa na warware mata shi sala-sala. "Ai Zinariya ce ta dawo yanzu haka ma ta na tsakar gida". Ba ta rufe bakinta na daka tsalle na tsallake ledan da ta shigo da shi ɗin, na fito tsakar gidan. Muna ganin juna ni da Zinariya habawa! Sai murna muka rumgume juna ana yaushe gamo. Na ja hannunta suka cikin ɗaki na zaunar da ita a bakin katifar ina faɗin"ke kuma da muka yi da ke ba za ki wuce wasu kwanaki ba. Kika je kika share waje kika yi zamanki. Ki ka bar ni nan cikin fargaba da zulumi". Ta ɗan murmuss tare da sadda kanta ƙasa kafin ta ce"dalili ne mai girma ya kawo hakan Amatullah, yanzu dai ba n ruwa na yi wanka tukunna don wallahi duk wani gaɓa a cikin jikina ciwo yake min". Kaina kawai na jinjina mata na ɗauki bokati na fita waje, ɗakin duk wacce na yi niyya da ra'ayi na faɗa na kamfato ruwa na yi fito babu mai ce wa da ni uffan tambaya na ba'asi. Na kai mata ruwan banɗaki ta shiga wankan na dawo na kallafawa duk wata wanda ta yi girki sai ta kawo mini plate guda ɗakina Zinariya ta ci ta yi haniƙan. Babu mai cewa da ni ko kanzil don na isa har na yi yawa, Hajiya Babba ma sai dai ta ganni ta jijjiga kaina don na zame mata ƙadangaruwar bakin tulu a bar ni na ɓata ruwa, a kashe ni a yi asarar tulu. Dole ƙanwar naƙi ta na ji tana gani sai idanuna ta kawo ta zuba mini. Sai da na bari ta yi wankan ta ci abincin, ta je ɗakin Hajiya Babba ta gaishe ta sannan ta dawo ta kwanta. Na zo kusa da ita na zauna na ce"na ta ƙiran layinki kullum a rufe, ga shi kuma yanzu na ga kin dawo babu waya a hannunki. An ya lafiya kuwa wannan tafiyar?". Kamar wacce na tsikara mata allura ko kuma wacce na sosa mata inda yake mata ƙaiƙaiyi ta yi zumbur ta tashi ta zauna tana fuskana. "Kin gan ni nan tsabar rashin hankalin da na shiga har ma na manta da wani abu a duniyar nan wai shi waya. Tun da na ba ro ofishin ƴan sanda da aka ba ni wayar na kashe ta na jefa a cikin ledan har yanzu da nake yi miki wannan maganar, ban sama nutsuwar da zan ɗauko ta ba". Cike da mamakin da ya bayyana har a cikin furucina na ce"sanar da ni abin da yake faru wa cikin gaggawa kar ki bari zuciyata ta buga. Don fargaba". Ta ja dogon numfashi kana ta soma zayyano mini zancen daki-daki wani yana bin bayan wani. "Na isa masauƙina a cikin babban otel kuma mafi tsada da tsaruwa a cikin garin Abuja, na ci mai kyau na sha mai kyau sannan na kwanta na yi baccin huce gajiya. Washe gari na shiga hidimar tarban Ogana da zai biyo jirgin yamma daga ingila zuwa ƙasa Najeriya. Ƙarfe shidan yamma ya ƙira ni ya shaida min ya iso har ma ya ɗauki hanyar zuwa otel ɗin da nake. Tabbas na cika da murna da har sai da ya sa ni na tashi na taka rawar daɗin jin kalamansa a gare ni. Ya Kawo min tsarabobi masu yawan gaske mun faranta ran junanmu a wannan ranar, sa boda mun yi marmarin juna sosai muna kwance da rana kwatsam na ji ana mana buga mana ƙofa. Lokacin bai tashi daga bacci ma don haka na tashi na je na buɗe ƙofar ina buɗe wa na ga wani Saurayi tsaye. Muka yi kallon-kallo da shi kafin na ce da shi Bawan Allah lafiya za ka zo ka na buga mana ƙofa? Waye kake nema?. Bai amsa min ba sai da na ga yana ƙoƙarin shiga cikin ɗakin na ƙi ba shi dama muka soma hayaniya da shi, da hakan ya sanya Ogana tashi daga baccin da yake yi ya zo shi wajen a nan na fahimci sun san juna ƙarshen sanayyana ma saurayin ƙaninsa ne na jini da suka fito daga ciki ɗaya. An yi rigima sosai sun yi musayar yawu da shi ainun na fusata na ɗauki kwalbar giyan da ya sha a daren jiya na je da nufi rotsawa saurayin a kansa ya zame na sama Saddam a goshinsa, take kwalbar ta tarwatse jini ya soma malala daga goshinsa take a wajen ya yanke jiki ya faɗi ba ya ko motsawa. Na gigice na rasa abin da zan yi kawai na ɗaura hannu a ka ina rusa kuka, ma'aikatan otel ɗin suka shigo su suka ƙira ƴan sanda suka zo suka tafi da ni aka rufe ni ban ƙara sanin halin da Saddam yake ciki ba sai da na yi kwanaki biyar cur a ofishin ƴan sandan kafin Saurayin ya zo shi a bakinsa nake jin mummunan halin da matar shi Saddam ɗin take ciki. Kuma ita ta buƙaci a yi min afuwa ta ƙara cewa idan halina ne wataran zan kai kaina inda ba zan iya fita ba, haƙiƙa na ji tausayinta ainun kuma na jinjina halin girma da dattakunta, ba ni da wani wajen da zan je haka nan ba ni da kuɗin da zan dawo gida sa boda ATM ɗina yan can ɗakin otel ɗin. Haka nan ma wayata ban san duniyar da take ciki ba". Ta tsagaita kafin ta ci gaba da cewa"da ƙafata na yi dogon tafiya har na isa gidan wata ƙawata da na muka haɗu da ita sanadiyyar bariki. Sai dai ita ta tuba har Allah ya kawo mata miji ta yi aurenta. A gidanta na zauna ta ba ni mafaka sa boda lokacin mijinta bayan cikin garin, a cikin gidanta na yi waɗannan tsawon kwanakin ina ta fafutukar yadda zan yi welcome back ɗin layina ko don kuɗaɗena da suke kwance a cikin akawuna. Da ƙyar hakan ya yiyu a cikin azurkinta ta taimaka ta ba ni ƙaramar wayar da na saka layin, ana cikin hakan mijinta ya ƙira ta a waya yake sanar da ita cewar yana hanyar dawowa lamarin da ya fara haifar da matsala a tsakaninmu ke nan, ta dade akan sai dai na bar cikin gidan don mijinta ba zai